குடியுரிமை சட்டத்தின்கீழ் முஸ்லிம்கள் நாடு கடத்தப்படுவார்களா? - மத்திய அரசு விளக்கம் !!

குடியுரிமை திருத்தச் சட்டத்தின்கீழ், இந்தியாவில் சட்டவிரோதமாக குடியேறியுள்ள நாடு கடத்தப்படுவார்களா என்ற மில்லியன் டாலர் கேள்விக்கு விளக்கம் அளித்துள்ளது. நாடாளுமன்றத்தில் அண்மையில் நிறைவேற்றப்பட்ட குடியுரிமை திருத்தச் சட்டம் (சிஏஏ), முஸ்லிம் உள்ளிட்ட சிறுபான்மையினருக்கு எதிரானது எனக் கூறி, திமுக தலைவர் மு.க.ஸ்டாலினில் தொடங்கி, மேற்கு வங்க முதல்வர் மம்தா பானர்ஜி வரை பல்வேறு அரசியல் கட்சித் தலைவர்கள் இச்சட்டத்துக்கு கடும் எதிர்ப்பு தெரிவித்து வருகின்றனர். இந்தச் சட்டத்தை உடனடியாக வாபஸ் பெற வேண்டும் என வலியுறுத்தி, வடகிழக்கு மாநிலங்கள் உள்ளிட்ட நாட்டின் பல்வேறு பகுதிகளில் தொடர் போராட்டங்கள் நடைபெற்று வருகின்றன. பல்வேறு பல்கலைக்கழகங்களை சேர்ந்த பல்லாயிரக்கணக்கான மாணவர்களும் இந்தப் போராட்டத்தில் இறங்கியுள்ளனர். இதனால், தலைநகர் டெல்லி, அஸ்ஸாம் உள்ளிட்ட இடங்களில் தொடர்ந்து பதற்றமான சூழ்நிலை நிலவி வருகிறது. இந்த நிலையில், குடியுரிமை திருத்தச் சட்டம் தொடர்பாக எதிர்க்கட்சிகள், மாணவர்கள், பொதுமக்கள் என பலதரப்பினரும் எழுப்பி வரும் பல்வேறு கேள்விகளுக்கு, மத்திய உள்துறை அமைச்சகம் இன்று விளக்கம் அளித்துள்ளது. கேள்வி -பதில் பாணியில் அந்த விளக்கம் அமைந்துள்ளது. 

கேள்வி : குடியுரிமை திருத்தச் சட்டத்தால், இந்திய குடிமக்கள் யாருக்காவது பாதிப்பு ஏற்படுமா? 

பதில் : முஸ்லிம் சமூகத்தைச் சேர்ந்தவர்கள் உள்பட எந்தவொரு இந்திய குடிமகனையும் இந்தச் சட்டம் பாதிக்காது. அரசியலமைப்பு சட்டம் வழங்கியுள்ள அடிப்படை உரிமைகளை அனைத்து இந்திய குடிமக்களும் எப்போதும் போல் அனுபவிக்கலாம். இவற்றை குடியுரிமைச் சட்டம் ஒருபோதும் பறிக்காது. இந்த உண்மைக்கு புறம்பாக, நாடு முழுவதும் தவறான பிரசாரம் மேற்கொள்ளப்பட்டு வருகிறது. கேள்வி : அப்படியென்றால், இந்தச் சட்டம் யாருக்காக தான் கொண்டு வரப்படுகிறது? பதில் : பாகிஸ்தான், ஆஃப்கானிஸ்தான், வங்கதேசம் ஆகிய நாடுகளிலிருந்து மத வன்முறைகளால் பாதிக்கப்பட்டு, 2014 ஆம் ஆண்டு டிசம்பர் 31ஆம் தேதி வரை இந்தியாவில் குடியேறிய, ஹிந்துக்கள், சீக்கியர்கள், சமணர்கள், பார்சி இனத்தவர் மற்றும் புத்த மதத்தை சேர்ந்தவர்களுக்காக இந்தச் சட்டம் கொண்டு வரப்படுகிறது. அதேசமயம், குறிப்பிட்ட மூன்று நாடுகளிலிருந்து இந்தியாவில் குடியேறியுள்ள முஸ்லிம் உள்ளிட்டோருக்கு இந்தச் சட்டம் பொருந்தாது. கேள்வி : ஹிந்துக்கள், சீக்கியர்கள் உள்ளிட்டடோருக்கு குடியுரிமைச் சட்டம் எந்த விதத்தில் பயனுள்ளதாக இருக்கும்? பதில் : பாகிஸ்தான், வங்கதேசம், ஆஃப்கானிஸ்தான் ஆகிய நாடுகளிலிருந்து இந்தியாவில் குடியேறியுள்ள ஹிந்துக்கள், சீக்கியர்கள், சமணர்கள் உள்ளிட்டோரிடம் பாஸ்போர்ட், விசா போன்ற ஆவணங்கள் முறையாக இல்லாவிட்டாலும் அல்லது இந்த ஆவணங்களே இல்லாவிட்டாலும், அவர்கள் இந்தச் சட்டத்தின் கீழ், இந்திய குடிமக்களாக தங்களை அங்கீகரிக்க கோரி விண்ணப்பிக்கலாம். அத்துடன், வெளிநாட்டிலிருந்து இங்கு குடியேறியவர்கள் இந்திய குடிமக்களாக அங்கீகாரம் பெற இங்கு குறைந்தபட்சம் 12 ஆண்டுகள் (1 +11) வசித்திருக்க வேண்டும் என்ற நிபந்தனை தளர்த்தப்பட்டு, ஒருவர் 6 ஆண்டுகள் (1+5) வரை இந்தியாவில் தங்கியிருந்தாலே அவரை குடிமகனாக அங்கீகரிக்க இச்சட்டம் வழி வகுக்கிறது. கேள்வி : ஆக இந்தச் சட்டத்தின்படி, பாகிஸ்தான், ஆஃப்கானிஸ்தான், வங்கதேசம் ஆகிய நாடுகளிலிருந்து குடியேறியுள்ள முஸ்லிம்கள் இந்திய பிரஜை ஆக முடியாது அப்படி தானே? பதில் : வெளிநாட்டிலிருந்து இந்தியாவில் குடியேறியேறுபவர்கள், இந்திய குடியுரிமையை பெறுவதற்கு தற்போது பின்பற்றப்பட்டு வரும் சட்ட விதிமுறைகள் எப்போதும் போல் நடைமுறையில் இருக்கும். குடியுரிமை திருத்தச் சட்டத்தில் இதுதொடர்பாக எவ்வித மாற்றமோ, திருத்தமோ மேற்கொள்ளப்படவில்லை. பாகிஸ்தான் உள்ளிட்ட மூன்று நாடுகளிலிருந்து இந்தியாவுக்குள் குடியேறிய ஆயிரக்கணக்கான முஸ்லிம்களுக்கு, கடந்த சில ஆண்டுகளில் இந்திய குடியுரிமை வழங்கப்பட்டுள்ளது. இந்திய - வங்கதேச எல்லைப் பிரச்சனைக்கு 2014இல் சட்டப்படி தீர்வு காணப்பட்ட பிறகு, வங்கதேசத்தை பூர்வீகமாக கொண்ட மொத்தம் 14,864 பேருக்கு இந்திய குடியுரிமை வழங்கப்பட்டுள்ளது. கேள்வி : பாகிஸ்தான் உள்ளிட்ட நாடுகளிலிருந்து இந்தியாவுக்குள் சட்டவிரோதமாக குடியேறியுள்ள முஸ்லிம்கள், இந்தச் சட்டத்தின்கீழ் நாடு கடத்தப்படுவார்களா? பதில் : எந்தவொரு வெளிநாட்டினரையும் நாடு கடத்துவதற்கான எந்த அம்சமும் குடியுரிமை திருத்தச் சட்???த்தில் நிச்சயமாக இடம்பெறவில்லை. அதேசமயம், சட்டவிரோதமாக இந்தியாவில் குடியேறியுள்ளவர்கள், வெளிநாட்டினருக்கான சட்டம் 1946 (Foreigners Act 1946), பாஸ்போர்ட் சட்டம் 1920 (The passport (Entry into India) Act 1920 ஆகிய இருசட்டங்களின் கீழ், முறைப்படி நாடு கடத்தப்படுவார்கள். ஒருவரின் சொந்த நாடு, அவர் சார்ந்த மதம் என்ற பாகுபடின்றி, இந்த நடவடிக்கை ஏற்கெனவே எடுக்கப்பட்டுதான் வருகிறது. அஸ்ஸாம் உள்ளிட்ட மாநிலங்களிலும் இதே நடைமுறை தான் தொடர்ந்து பின்பற்றப்படும். இவ்விரு சட்டங்களிலும் மாநில அரசுகள், மாவட்ட நிர்வாகங்களுக்கும் தேவையான அதிகாரம் அளிக்கப்பட்டுள்ளது. எனவே, குடியுரிமை திருத்தச் சட்டத்தின்கீழ், முஸ்லிம்கள் அவர்களின் சொந்த நாடுகளுக்கே திருப்பி அனுப்பப்படமாட்டார்கள். அதாவது, அவர்கள் நிச்சயமாக நாடு கடத்தப்படமாட்டார்கள்