சென்னையில் தந்தை வயதுடைய நபருடன் முறையற்ற தொடர்பில் இருந்ததாகக் கூறப்படும் 24 வயது இளம்பெண், ஒரு கட்டத்தில் அவனது தொல்லை தாங்காமல் கழுத்தை அறுத்து கொலை செய்ததாக கூறப்படும் சம்பவம் அதிர்ச்சியை ஏற்படுத்தியுள்ளது.
திருவொற்றியூர் சாத்துமா நகர் பகுதியைச் சேர்ந்த "அம்மன்" சேகர் என்பவர் அதே பகுதியில் கற்பூர வியாபாரம் செய்து வந்துள்ளார். திங்கட்கிழமை இரவு துறைமுக குடியிருப்பு அருகே சேகர் கழுத்தறுத்து கொலை செய்யப்பட்டுக் கிடந்தார்.
அவரது சடலத்தை மீட்டு விசாரணையைத் தொடங்கிய போலீசார் பவித்ரா என்ற இளம்பெண்ணை கைது செய்தனர். அவரிடம் நடத்திய விசாரணையில் திடுக்கிடும் தகவல்கள் கிடைத்தன.
கொலையான சேகருக்கு கல்லூரி படிப்பு முடித்த மகள் ஒருவர் இருக்கிறார். அவருடைய வகுப்புத் தோழியான பவித்ரா, சேகரின் வீட்டுக்கு அடிக்கடி வந்து செல்வது வழக்கம். மகள் வயதுகொண்ட பவித்ராவை சேகர் தனது பாலியல் இச்சைக்கு உட்படுத்தியதாகக் கூறப்படுகிறது.
அவர் கேட்பதையெல்லாம் வாங்கிக் கொடுத்து தனது கட்டுப்பாட்டுக்குள் வைத்திருந்த சேகரின் வயது அக்கம்பக்கத்தினருக்கு சந்தேகத்தை எழுப்பவில்லை. கடந்த 4 ஆண்டுகளாக நடந்து வந்த முறையற்ற உறவு, அண்மையில்தான் சேகரின் மகளுக்கும் அதன் பின்னர் பவித்ராவின் குடும்பத்தாருக்கும் தெரியவந்திருக்கிறது. இருவரையுமே அவர்களது குடும்பத்தினர் கண்டித்துள்ளனர்.
அதன் பின்னரும் இந்தத் தொடர்பு நீடித்ததாகக் கூறப்படும் நிலையில், பவித்ராவுக்கு அவரது பெற்றோர் வரன் பார்க்கத் தொடங்கியுள்ளனர். இதனையடுத்து மனம் மாறிய பவித்ரா, தன்னை விட்டு விலகுமாறு சேகரிடம் கூறியுள்ளார். ஆனால் அதனை மறுத்து, தொடர்ந்து தன்னை மிரட்டி பாலியல் இச்சைக்கு உட்படுத்தியதால் அவரை கொலை செய்ததாக பவித்ரா ஒப்புக்கொண்டார் என போலீசார் கூறுகின்றனர்.
சம்பவத்தன்று சேகரின் பிறந்தநாள் என்று கூறப்படும் நிலையில், அவருக்குப் பரிசு கொடுப்பதாக இருட்டான பகுதிக்கு அழைத்துச் சென்று வாயைப் பொத்தி, கண்களில் ஃபெவிக்காலை ஊற்றியும், கத்தியால் கழுத்தை அறுத்தும் கொலை செய்துள்ளதாக போலீசார் தெரிவித்தனர்.
தந்தை - மகள் வயது கொண்ட இருவரது முறையற்ற பழக்கம் இருவரது வாழ்வையுமே சீரழித்துள்ளதாக போலீசார் கூறுகின்றனர்.
No comments:
Post a Comment