5 மாத கர்ப்பிணியை கடத்தி பாலியல் துன்புறுத்தலில் ஈடுபட்ட 4 பேர் கைது!

கடலூர் அருகே 5 மாத கர்ப்பிணியை காரில் கடத்தி பாலியல் துன்புறுத்தலில் ஈடுபட்ட 4 பேரை போலீசார் கைது செய்துள்ளனர். 

கடலூர் புதுப்பாளையம் பகுதியை சேர்ந்த ஜெயப்பிரதா என்ற இளம்பெண், தமது கணவருடன் ஏற்பட்ட கருத்து வேறுபாடு காரணமாக அவரை விட்டு பிரிந்து ஜெகன் என்பவருடன் வாழ்ந்து வருகிறார். தற்போது அவர் 5 மாத கர்ப்பிணியாக உள்ள நிலையில், கடலூர் புதுநகர் பகுதியில் உள்ள திரையரங்கம் ஒன்றில் படம் பார்க்க கடந்த ஞாயிற்றுக்கிழமை ஜெகனுடன் சென்றுள்ளார். 

அங்கு வந்த திருப்பாப்புலியூர் மார்க்கெட் தெருவை சேர்ந்த 4 பேர், ஜெயப்பிரதாவிடம் சேட்டையில் ஈடுபட்டுள்ளனர். இதனால் அவர்களிடம் ஜெயப்பிரதா தனது காலணியால் அடிப்பேன் என தெரிவித்துள்ளார். இதனால் ஆத்திரம் அடைந்த அந்த 4 பேரும், ஜெயப்பிரதாவை காரில் கடத்தி சென்று மறைவான இடத்தில் வைத்து பாலியல் தொல்லை அளித்துள்ளனர். 

இதனால் பாதிக்கப்பட்ட ஜெயப்பிரதாவுக்கு கடலூர் அரசு மருத்துவமனையில் தீவிர சிகிச்சை அளிக்கப்பட்டு வருகிறது. இது தொடர்பாக வழக்குப்பதிவு செய்த போலீசார், கர்ப்பிணியை துன்புறுத்திய 4 பேரையும் கைது செய்து விசாரணை நடத்தி வருகின்றனர். -